පළකල දිනය : Fri, Dec 8th, 2017

තවත් දළ ඇතුන් දෙදෙනෙක් අතුරුදහන් ! (Photos)

දෙස් විදෙස් සංචාරකයන්ගේ ආකර්ෂණයට ලක්ව මින්නේරිය ජාතික වනෝද්‍යානයේ ජීවත් වූ කතිර දළ ඇතාද ජාවාරම්කරුවන්ගේ ගොදුරක් වන්නට ඇතැයි පරිසරවේදීහු සඳහන් කරති.

මීට වසර දෙකකට පෙරදී මින්නේරිය ජාතික වනෝද්‍යානයේදී අන්තිම වරට දැකගන්නට ලැබුණ මෙම ඇතා උසින් අඩි 12කි.

අඩි 6ක් පමණ දිගින් යුත් දළ යුගල එකිනෙක හාවී තිබීම නිසා කතිර දළ ඇතා නමින් සංචාරකයන්ගේ ආකර්ෂණයට ලක්ව සිටියේය.
 
මෙම දළ ඇතා දඩයම්කරුවන්ගේ ප්‍රහාරයකට ලක්ව සිටියදී ගිරිතලේ පශු වෛද්‍ය ඒකකයේ වෛද්‍යවරයා ප්‍රමුඛ නිලධාරීන් විසින් කිහිප වතාවක්ම ප්‍රතිකාර ලබාදී තිබිණි.

මෙම ඇතාගේ අතුරුදන්වීම පිළිබඳ තොරතුරු අනාවරණය කිරීමේ ප්‍රතිඵලයක් වශයෙන් වනජීවී අමාත්‍ය ගාමිණී ජයවික්‍රම පෙරේරා මහතා විසින් කමිටුවක් පත්කොට ඇතා සොයාබැලීමේ වැඩපිළිවෙළක් ක්‍රියාත්මක කළේය.

කතිර දළ ඇතා පසුගිය වසර දෙකක පමණ වූ කාලය තුළදී පොළොන්නරුව දිස්ත්‍රික්කයේ මින්නේරිය, මාදුරුඔය, කවුඩුල්ල හා සෝමාවතිය ජාතික වනෝද්‍යානවලදී දැකගන්නට නොලැබුණු බව පොළොන්නරුව කලාපය භාර වනජීවී සහකාර අධ්‍යක්ෂ ඩබ්ලිව්.ඒ.ජේ. වික්‍රමසිංහ මහතා කීය.

වනජීවී සංරක්ෂණ දෙපාර්තමේන්තුවේ නිලධාරීන් කිහිපදෙනකුගෙන් මේ පිළිබඳව විමසීමේදී කතිර දළ ඇතා පිළිබඳව කිසිදු තොරතුරක් දැනගන්නට නොලැබුණි.

මීට අමතරව අම්පාර දිස්‌ත්‍රික්‌කයේ පානම ශාස්‌ත්‍රවේලියේ ජීවත් වූ දළපූට්‌ටුවාද මාස 10 ක කාලයක සිට දකින්නට නැති බව ප්‍රදේශවාසීහු පවසති.

පානම දළපුට්‌ටුවා අවසන් වරට ප්‍රදේශවාසීන් දැක ඇත්තේ පසුගිය පෙබරවාරිය අවසානයේදීය.

තොරතුරක් වේ නම් 0112-888585, Fax-0112-883355 හෝ විද්‍යත් තැපෑල වන dg@dwc.gov.lk දැනුම් දෙන ලෙස වනජීවී සංරක්ෂණ දෙපාර්තුමේන්තුව මහජනතාවගෙන් ඉල්ලීමක් කරනු ලබයි.

  • 1.2K
    Shares

ඔබගේ අදහස් උදහස් එක්කරන්න

Back to Top Button