පළකල දිනය : Wed, Sep 26th, 2018

සරුංගලය වෙසක් කූඩුව චීනෙන් – තල කුරහන් ඉන්දියාවෙන් !

“රුපියලේ අගය පහත වැටීම පසුපස තිබෙන කථාව අපි අවබෝධ කරගත යුතුයි. අපිට අවශ්‍ය දේවල් අපේ රටේ නිෂ්පාදනය නොකර විදේශ රටවල් මත යැපීම නිසා තමයි අද අපිට මේ ඉරණම අත් වී තිබෙන්නේ. කුඩා කාලයේ බට ලීවලින් අපි හදාගත්ත සරුංගලයත්, අද ගෙන්වන්නේ චීනයෙන් හා ජපානයෙන්. වෙසක් කූඩු, ඒත එහෙමයි. පලතුරු ටික විතරක් නෙවෙයි අපේ රටේ හැදිච්ච කුරක්කන්, කව්පි, මිරිස්, බඩ ඉරිඟු, තල, අබ මේවා ඔක්කොම දැන් මේ රටට ගෙන්වන්නේ ඉන්දියාවෙන් හා බංගලාදේශයෙන්. එහෙම කර කර රුපියලේ අගය බාල්දු වුණා කියලා කෑ ගහලා ඵලක් තියෙනව ද? අපි වවාගෙන අපිම කාපු සංස්කෘතියක් අතහැර දාපු අපි වගේ රටකට මීට වඩා සිදුවිය හැකි වෙනත් දෙයක් තියෙනවද?” කෘෂිකර්ම අමාත්‍ය මහින්ද අමරවීර මේ අදහස් පලකළේ බෙලිඅත්තේ පැවති ජන හමුවකදීය.

“ශ්‍රී ලංකා රුපියල පසුගිය දින කිහිපය තුළ දිගින් දිගටම එහි අගය පහළ ගියා. රුපියල ඩොලරයට සාපේක්ෂව අවප්‍රමාණය වීම සම්බන්ධයෙන් විවිධ අය තමන්ගේ දේශපාලන දෘෂ්ටිකෝණය මත විවිධඅදහස් පළ කරනවා. සමහරු කියනවා, රුපියල බාල්දු වුණේ මේ රජයේ වැරදි ආර්ථික ප්‍රතිපත්ති නිසා කියලා. ඒක සම්පුර්ණයෙන්ම අසත්‍යයක්. අපි දන්නවා මේවනවිට ඇමරිකා එක්සත් ජනපදයේ ජනාධිපති ඩොනල්ඩ් ට්‍රම්ප් ඩොලරය ශක්තිමත් කිරීම සඳහා පියවර රැසක් ගෙන තිබෙනවා.

චීනයෙන් ඇමරිකාවට ආනයනය කරන භාණ්ඩවලට විශාල බද්දක් පනවනු ලැබුවා.දැන් චීනයත්, ඇමරිකාවත් අතරේ සීතල වෙළඳ යුද්ධයක් පටන් අරගෙන තියෙනවා. පැරණි කියමක් තියෙනවා “සංවර්ධිත රටවල්වලට හෙම්බිරිස්සාව හැදෙනකොට අපි වගේ කුඩා රටවල්වලට ඒ නිසා නියුමෝනියාව හැදෙනවා” කියලා. ඒ නිසා අපේ රුපියල අවප්‍රමාණය වීම රජයේ වැරදි ආර්ථික ප්‍රතිපත්ති නිසා සිදුවූවත් නොව ජාත්‍යන්තරය තුළ පවතින ආර්ථික ක්‍රියාවලියක බලපෑම නිසායි.

රුපියලේ අගය අවප්‍රමාණය වීම අපේ රටට විතරක් බලපාපු කාරණාවක් නෙවෙයි. ඉන්දියානු රුපියල 12%කින් ද පකිස්තානු රුපියල 5.03%කින් ද සිංගප්පූරු ඩොලරය 2.41%කින් ද පිලිපීන පෙසෝ 5.18%කින් ද යූරෝ 6.27%කින් ද තුර්කි ලිරා 22.28%කින් ද මුදලේ අගය අවප්‍රමාණය වෙලා. නමුත් ඒ රටවල මිනිස්සු ආණ්ඩුවට බනින්නේ නෑ. ඒ අය දන්නවා ඒක ආණ්ඩුවේ වැරැද්දක් නොවේ කියලා.

ඒ නිසා රුපියලේ අගය ඉදිරි කාලය තුළ තවදුරටත් අවප්‍රමාණය වීම වැළැක්වීම සඳහා රජය වශයෙන් අපි පියවර රැසක් ගත්තා. වාහන ආනයනය තාවකාලිකව සීමා කළේ ඒ නිසයි. ඒ වගේම අත්‍යවශ්‍යම නොවන භාණ්ඩ ආනයනය කිරීම තාවකාලිකව හෝ නැවතිය යුතුයි. එවිට විදේශ අටවලට ඇදීයන ඩොලර් අපිට අපේ රටේම ඉතිරි කරගත හැකියි. රජය දැන් මේ සම්බන්ධයෙන් අවධානය යොමුකර තිබෙනවා.”

ඔබගේ අදහස් උදහස් එක්කරන්න

Back to Top Button