පළකල දිනය : Mon, Jul 29th, 2019

රටවල් 10ක සංචාරකයින්ට ගාස්තු රහිත වීසා

රටවල් 10 කින් ශ්‍රී ලංකාවට පැමිණෙන සංචාරකයින් සඳහා මෙරට ගුවන්තොටුපලේදීම ගාස්තු රහිතව වීසා නිකුත් කිරීමට රජය පියවර ගෙන ඇතැයි සංචාරක අමාත්‍ය ජෝන් අමරතුංග මහතා සඳහන් කරයි.

ඒ අනුව පාස්කු ඉරිදා ත්‍රස්ත ප්‍රහාරයෙන් පසු ලංකාවට සංචාරකයින් පැමිණීම ප්‍රවර්ධනය කර ගැනීමේ අරමුණෙන් එංගලන්තය, චීනය, ඉන්දියාව, රුසියාව, ඩෙන්මාර්කය, ස්වීඩනය, නෝර්වේ, පින්ලන්තය, අයිස්ලන්තය, පිලීපීනය, යන රටවල් වෙත මෙම ගාස්තු රහිත වීසා බලපත් ලබා දීම සිදු කෙරෙන බව සංචාරක අමාත්‍යවරයා කියා සිටියි.

රටවල් වලින් පැමිණෙණ සංචාරකයින්ට මෙරටට ගුවන් තොටුපළේදීම ගාස්තු රහිතව වීසා නිකුත් කිරීමේ කටයුතු ළඟදීම ආරම්භ කෙරෙන අතර මෙය නියමු ව්‍යාපෘතියක් ලෙස මාස 6ක කාලයක් ක්‍රියාත්මක කෙරෙන බවද අමාත්‍ය ජෝන් අමරතුංග මහතා වැඩිදුරටත් ප්‍රකාශ කළේය.

මේ සඳහා තමන් ඉදිරිපත් කළ අමාත්‍ය මණ්ඩල පත්‍රිකාවටද පසුගියදා අමාත්‍ය මණ්ඩල අනුමැතියද හිමිවූ බව හෙතෙම පැවසීය.

මේ අතර අප්‍රේල් මාසයේ සිදුවූ පාස්කු ප්‍රහාරය නිසා තාවකාලිකව අත්හිටවු තායිලන්තය සිංගප්පූරුව, නවසීලන්තය, ඕස්ට්‍රේලියාව, කාම්බෝජය සහ ජපානය යන තවත් රටවල් 36 කින් මෙරටට පැමිණෙන සංචාරකයින්ට ගාස්තු රහිතව ගුවන්තොටුපළේදී වීසා නිකුත් කිරීමද යළි ආරම්භ වන බවද සංචාරක අමාත්‍යවරයා කියා සිටී.

එම ත්‍රස්ත ප්‍රහාරය හේතුවෙන් මතු වූ ආරක්ෂක තත්ත්වයන් යළි යථා තත්ත්වයට පත්ව ඇති හෙයින් එම රටවල් සඳහාද ක්‍රියාත්මක වේ.

සාමාන්‍යයෙන් මැයි මාසයේ සිට මෙරට සංචාරකයින් පැමිණීමේ අඩුවීමක් පවතින බැවින් ඊට පිළියම් ලෙස සංචාරකයින් පැමිණීම වර්ධනය කර ගැනීම මෙම පියවර ගත් බවද අමාත්‍ය ජෝන් අමරතුංග මහතා වැඩිදුරටත් කියා සිටියේය.

(තිළිණි ද සිල්වා)
Source – ලංකාදීප

ඔබගේ අදහස් උදහස් එක්කරන්න

Back to Top Button