පළකල දිනය : Tue, Mar 17th, 2020

රටම අනතුරේ තියෙද්දී ක්‍රිකට් ක්‍රීඩකයින්ට වෙඩිනොවදින වාහන ගේන්න යයි ?

ශ්‍රී ලංකා ක්‍රිකට්වලට වෙඩිනොවදින වාහන ගෙන්වීමේ යෝජනාවක් පසුගියදා පැවති විධායක කමිටුවේදී සලකා බලා තිබේ.

ඒ අනුව ක්‍රිකට් සභාපති ෂම්මි සිල්වා සහ උපසභාපති රවීන් වික්‍රමරත්න යන මහත්වරු විධායක කමිටුවට දන්වා ඇත්තේ ක්‍රිකට් ක්‍රීඩකයන්ගේ ආරක්ෂාව සම්බන්ධයෙන් නොසලකා හැරිය නොහැකි තත්ත්වයක් හේතුවෙන් මේ පිළිබඳ වහාම අවධානය යොමු කළ යුතු බවයි.

ඒ අනුව වෙඩිනොවදින වාහනවල මිල ගණන් කැඳවන්නැයි ක්‍රිකට් සභාපතිවරයා දන්වා තිබේ.

අප මේ පිළිබඳ ක්‍රිකට් උපසභාපති රවීන් වික්‍රමරත්න මහතාගෙන් විමසීමක් කළ අතර, ඔහු පවසා සිටියේ මේ වනවිට ශ්‍රී ලංකා ක්‍රිකට් කණ්ඩායමට තර්ජනයක් ඇති හෙයින් මෙවැනි තීන්දුවක් ගත් බවයි.

“පාකිස්තානයට අනෙකුත් රටවල් සංචාරයට නොයන අවස්ථාවක අපේ කණ්ඩායම පාකිස්තානයට ගියා. ඒ නිසා අපේ ක්‍රිකට් කණ්ඩායමට ඕනෑම අවස්ථාවක තර්ජනයක් මතුවෙන්න පුළුවන්. පාකිස්තානය පාකිස්තාන ක්‍රිකට් කණ්ඩායමට වෙඩිනොවදින රථ ලබාදීලා තියෙනවා වගේම අපිත් අපේ කණ්ඩායමට වෙඩි නොවදින වාහන ගෙන්වන්න සැලසුම් කරලා තියෙනවා” යැයි උපසභාපති රවීන් වික්‍රමරත්න මහතා වැඩිදුරටත් පවසා සිටියේය.

ඔබගේ අදහස් උදහස් එක්කරන්න

Back to Top Button